BCEL

ທະນາຄານການຄ້າຕ່າງປະເທດລາວ ( ທຄຕລ) ແມ່ນໄດ້ຖືກສ້າງຕັ້ງຂື້ນ ໃນຂະນະທີ່ ສປປ ລາວ ໄດ້ປະກາດເອກະລາດ ໃນວັນທີ 02 ທັນວາ 1975 ແລະ ໄດ້ເລີ່ມ ດໍາເນີນທຸລະກິດ ນັບແຕ່ປີ 1975 ເປັນຕົ້ນມາ. ໃນໄລຍະປີ 1975 ຫາ 1976, ທຄຕລ ໄດ້ປະຕິບັດພາລະບົດບາດພິເສດ ຊຶ່ງເປັນສາຂາຂອງທະນາຄານລັດແຫ່ງລັດ ໃນເມື່ອກ່ອນ ຫຼື ທະນາຄານແຫ່ງ ສ ປປ ລາວ ໃນປະຈຸບັນ ແລະ ໄດ້ຖືກມອບໝາຍ ໃຫ້ເປັນທະນາຄານແຫ່ງດຽວໃນ ສປປ ລາວ ທີ່ສາມາດດຳເນີນທຸລະກິດກັບສາກົນ (Inter Banking) ແລະ ກໍ່ຍັງໄດ້ຖືກມອບໝາຍ ໃຫ້ດຳເນີນການຄຸ້ມຄອງ ບັນດາເງິນຊ່ວຍເຫຼືອລ້າ ແລະ ເງິນກູ້ຕ່າງໆ ຈາກຕ່າງປະເທດ ແລະ ອົງການຈັດຕັ້ງສາກົນ ທີ່ໄດ້ມອບໃຫ້ແກ່ລັດຖະບານ ສປປ ລາວ. 

ນັບຕັ້ງແຕ່ ວັນທີ 01 ເດືອນພະຈິກ 1989 ທະນາຄານການຄ້າຕ່າງປະເທດລາວແມ່ນໄດ້ຖືກປ່ຽນເປັນທະນາຄານທຸລະກິດລັດເຕັມຮູບແບບໂດຍອີງຕາມກົດໝາຍທະນາຄານແຫ່ງ ສປປ ລາວ ແລະ ດຳລັດກ່ຽວກັບການຄຸ້ມຄອງ ທະນາຄານທຸລະກິດ. ໂດຍສະເພາະການຫັນປ່ຽນ ທະນາຄານ ຈາກລັດຄຸ້ມຄອງບໍລິຫານ ໄປສູ່ຮູບແບບທະນາຄານ ທຸລະກິດລັດ ທີ່ມີການໄລ່ລຽງປະສິດທິຜົນກຸ້ມຕົນເອງທາງດ້ານລາຍຮັບ-ລາຍຈ່າຍ ແລະ ງົບປະມານເງິນເດືອນຂອງພະນັກງານ. ພ້ອມດຽວກັນນັ້ນ ໃນວັນທີ 11 ມັງກອນ 2011 ທຄຕລ ກໍໄດ້ຫັນປ່ຽນຈາກ ທະນາຄານທຸລະກິດລັດ ມາເປັນທະນາຄານການຄ້າຕ່າງປະເທດລາວ ມະຫາຊົນ ແລະ ຈົດທະບຽນຢູ່ໃນຕະຫຼາດຫຼັກຊັບລາວ ເປັນທະນາຄານທຳອິດໃນ ສປປ ລາວ, ໃນນັ້ນຜູ້ຖືຫຸ້ນລາຍໃຫຍ່ ແມ່ນກະຊວງການເງິນຖືຮຸ້ນ 70%.ພະນັກງານ ທຄຕລ 5%, ຄູ່ຮ່ວມຍຸດທະສາດ 10% ແລະ ມະຫາຊົນທົ່ວໄປ 15%.

ທຄຕລ ເປັນທະນາຄານມະຫາຊົນດຳເນີນການເຄື່ອນໄຫວວຽກງານພາຍໃຕ້ການຄຸ້ມຄອງຂອງກະຊວງການເງິນ, ທະນາຄານແຫ່ງ ສປປລາວ. ທຄຕລ ພວກເຮົາມີຄວາມມຸ່ງໝັ້ນໃນການສ້າງປະໂຫຍດໃຫ້ແກ່ລູກຄ້າ ແລະ ປະກອບສ່ວນເຂົ້າໃນນະໂຍບາຍເສດຖະກິດຂອງລັດຖະບານໃນການປັບປຸງ, ພັດທະນາ, ສ້າງຄວາມທັນສະໄໝ ແລະ ຂະຫຍາຍການບໍລິການໃຫ້ທັງພາຍໃນ ແລະ ຕ່າງປະເທດ. ປະຈຸບັນການບໍລິການຂອງ ທຄຕລ ແມ່ນປະກອບດ້ວຍ: ການບໍລິການດ້ານເງິນຝາກ, ເງິນກູ້, ອອກໃບຮັບປະກັນຈາກທະນາຄານ, ຊຳລະສະສາງທັງພາຍໃນ ແລະຕ່າງປະເທດ, ແລກປ່ຽນເງິນຕາຕ່າງປະເທດ,ບໍລິການບັດ ເອທີເອັມ, ບໍລິການບັດເຄຼດິດສາກົນ, ການບໍລິການຜ່ານໂທລະສັບມືຖື, ອິນເຕີເນັດ ແລະອື່ນໆ. ປະຈຸບັນ ທຄຕລ ມີ 19 ສາຂາ, 75 ໜ່ວຍບໍລິການ, 15 ຫ້ອງແລກປ່ຽນ ແລະ ມີຫຼາຍ 100 ກວ່າທະນາຄານຕົວແທນໃນໂລກ.

ນອກຈາກນັ້ນ, ທະນາຄານການຄ້າຕ່າງປະເທດລາວ ມະຫາຊົນ ຍັງໄດ້ຮ່ວມທຶນກັບທະນາຄານລົງທຶນ ແລະ ພັດທະນາຫວຽດນາມສ້າງຕັ້ງທະນາຄານທຸລະກິດລາວ-ຫວຽດ ຂຶ້ນໃນວັນທີ 22 ມິຖຸນາ 1999, ສ້າງຕັ້ງບໍລິສັດຮ່ວມທຸລະກິດປະກັນໄພລາວ – ຫວຽດ ຂຶ້ນໃນປີ 2008 ແລະ ໃນປີ 2010 ໄດ້ຮ່ວມທຶນກັບທະນາຄານ BRED BANK ຂອງຝຣັ່ງສ້າງຕັ້ງທະນາຄານຮ່ວມທຸລະກິດລາວ-ຝຣັ່ງ (BFL) ແລະ ຮ່ວມທຶນກັບບໍລິສັດຫຼັກຊັບ KTZMICO ຂອງປະເທດໄທສ້າງຕັ້ງບໍລິສັດ BCEL-KT (ທຄຕລ-ກຣຸງໄທ) ໃນປີ 2011. ພ້ອມນັ້ນ ໃນ 2014 ປີໄດ້ຮ່ວມທຶນກັບທະນາຄານຟູດຽນສ້າງຕັ້ງທະນາຄານ – ລາວຈີນ. อ้างอิง

• ປະຈຸບັນ, ໂຄງສ້າງການຖືຮຸ້ນຂອງທະນາຄານ: ລັດຖະບານຖືຮຸ້ນ 70%, ຮຸ້ນຂອງນັກລົງທຶນພາຍໃນ 10%, ຄູ່ຮ່ວມຍຸດທະສາດ 10% ແລະ ຜູ້ຖືຮຸ້ນຈາກຕ່າງປະເທດ 10%
• ກິດຈະກຳຫຼັກຂອງທະນາຄານ ແມ່ນເພື່ອຕອບສະໜອງການບໍລິການ ລວມທັງການລະດົມທຶນ ແລະ ຮັບຝາກເງິນໄລຍະສັ້ນ, ກາງ ແລະ ຍາວຈາກອົງກອນ ແລະ ບຸກຄົນ. ເງິນກູ້ໄລຍະສັ້ນ, ກາງ, ຍາວ ໃຫ້ແກ່ຫົວໜ່ວຍທຸລະກິດ ແລະ ບຸກຄົນຕາມຈຸດປະສົງ ແລະຄວາມສາມາດໃນການສະໜອງທຶນຂອງທະນາຄານ, ບໍລິການແລກປ່ຽນເງິນຕາຕ່າງປະເທດ, ການບໍລິການການຄ້າລະຫວ່າງປະເທດ, ບໍລິການໜັງສືສິນເຊື່ອ, ຄ້ຳປະກັນ, ໃຫ້ບໍລິການຊື້ຂາຍວັດຖຸມີຄ່າອື່ນໆ ແລະ ໃຫ້ບໍລິການດ້ານທະນາຄານອື່ນໆ ທີ່ໄດ້ຮັບອະນຸຍາດຈາກທະນາຄານແຫ່ງ ສປປ ລາວ
• ທຶນຈົດທະບຽນ: ວັນທີ 31 ທັນວາ 2016 ແມ່ນ 682,888 ລ້ານກີບ
• ສະພາບໍລິຫານ ທະນາຄານການຄ້າຕ່າງປະເທດລາວ ມະຫາຊົນ:

1. ທ່ານ ດຣ ບຸນເຫຼືອ ສິນໄຊວໍລະວົງ   ຫົວໜ້າກົມນະໂຍບາຍການເງິນ ກະຊວງການເງິນ   ເປັນປະທານ
2. ທ່ານ ຄຳສຸກ ສູນດາລາ           ບຸກຄົນເອກະລາດຈາກພາຍນອກ                ເປັນຮອງປະທານ
3. ທ່ານ ພູຂົງ ຈັນທະຈັກ            ຜູ້ອຳນວຍການໃຫຍ່ ທຄຕລ                   ເປັນກຳມະການ
4. ທ່ານ ພັນຊະນະ ຄຸນນຸວົງ         ຮອງຜູ້ອຳນວຍການໃຫ່ຍ ທຄຕລ                ເປັນກຳມະການ
5. ທ່ານ ນ.ຂັນທະລີ ວົງໄຊຍະລາດ    ຮອງຜູ້ອຳນວຍການໃຫ່ຍ ທຄຕລ                ເປັນກຳມະການ
6. ທ່ານ ວຽງໄຊ ຈັນທະວີສຸກ         ຫົວໜ້າພະແນກຄຸ້ມຄອງສາຂາ ຕາງໜ້າພະນັກງານ  ເປັນຳມະການ
7. Mr Marc ROBERT ຕາງໜ້າທະນາຄານ COFI BRED ໃນນາມຄູ່ຮ່ວມຍຸດທະສາດ    ເປັນກຳມະການ 

• ໜ່ວຍບໍລິການທີ່ສູນການຄ້າໄອເຕັກມໍຂອງ BCEL Bank: ທະນາຄານການຄ້າຕ່າງປະເທດລາວ ມະຫາຊົນ ໜ່ວຍບໍລີການໄອເຕັກຕັ້ງຢູ່ໄອເຕັກມໍຊັ້ນ1, ເປິດໃຫ້ບໍລິການທຸກວັນລັດຖະການ ແລະ ວັນເສົາ – ອາທິດ, ເວລາເປີດບໍລິການ 8:30 – 15:30 ໂມງ (ເວລາປິດໃຫ້ບໍລິການຕົວຈິງອາດຈະຂື້ນກັບການກໍານົດຂອງສະຖານທີ່ ທີ່ໜ່ວຍບໍລິການຕັ້ງຢູ່) ນອກຈາກກການໃຫ້ບໍລິການປົກກະຕິໃນວັນລັດຖະການແລ້ວ ທ່ານຍັງສາມາດໃຊ້ບໍລິການໃນ ວັນເສົາ – ອາທິດດັ່ງນີ້ :

1. ເປີດບັນຊີໃໝ່ (ສະເພາະເງິນຝາກມີກຳນົດ ແລະບັນຊີເງິນຝາກປະຢັດ)
2. ບໍລິການຝາກ – ຖອນເງິນ
3. ໂອນເງິນລະຫວ່າງບັນຊີພາຍໃນ ທຄຕລ
4. ຊຳລະຄ່າທາງ, ພາສີທີ່ດິນ, ອາກອນ
5. ຊຳລະຄ່າສາທາລະນຸປະໂພກຕ່າງໆ (Bill Payment)
6. ຮັບເງິນດ່ວນ MoneyGram, Speed send, BCOME
7. ແລກປ່ຽນເງິນຕາຕ່າງປະເທດ (ເງິນຕາຕ່າງປະເທດແລກເປັນເງິນກິບ)
8. ເປີດ BCEL One, I-Bank, SMS Banking ໃໝ່, ອອກລະຫັດໃໝ່, ຂໍຕັ້ງຄໍາຖາມປອດໄພໃໝ່ ແລະ ປ່ຽນແປງຂໍ້ມູນຜູ້ນໍາໃຊ້ໃນລະບົບ ເຊັ່ນ: ປ່ຽນ E-mail, ເບີໂທລະສັບເປັນຕົ້ນສໍາລັບ BCEL One, I-Bank
9. ເປີດບັດ ATM ໃໝ່
10. ບໍລິການຕູ້ຖອນເງິນ ATM ແລະ ຕູ້ຮັບເງິນ CDM.

ທີ່ຕັ້ງ ແລະ ເຄື່ອຂ່າຍ: ສຳນັກງານໃຫຍ່ຂອງທະນາຄານ ຕັ້ງຢູ່ອາຄານເລກທີ 01, ຖະໜົນບາງຄຳ, ບ້ານຊຽງຍືນ, ເມືອງຈັນທະບູລີ, ນະຄອນຫຼວງວຽງຈັນ 

” ທະນາຄານການຄ້າຕ່າງປະເທດລາວ ມະຫາຊົນ ທັນສະໄໝ ວອງໄວ ໝັ້ນໃຈ. “